2014年6月16日 星期一

生命的印記 (下)




林前 11:1 你們該效法我、像我效法基督一樣

亦即係話,呢度提到既效法其實可以一代效法一代,耶穌基督效法邊個呀?當然效法雅偉;保羅效法邊個呀,效法耶穌基督;哥林多教會既弟兄姊妹效法邊個呀,就係哥林多教會既創辦人保羅,如果咁樣推算落來,哥林多教會既下一代應該需要效法當時既弟兄姊妹。

耶穌的榜樣

如何學習「效法」呢?我地可以參考耶穌與門徒既關係,「門徒」既意思其實指到學生,學生同老師既關係就係學生係老師既跟隨者,效法考。我地見到耶穌同佢一班所愛既門徒既關係並唔係上午九點集合佢地上課,係咁講講講,今日教「八福」,然後下午六時放學各自番屋企溫習、做功課,聽朝番來教「咩叫背十架啦﹗」,跟住耶穌既筆記抄呀抄。

「門徒」更深層次既係佢地跟著耶穌呢位老師一起生活,老師唔單止言教,仲有身教,佢唔係只係係黑板上寫「你地應當彼此相愛,你們應當彼此洗腳﹗」卻係真係拿盤水,拿條毛巾,逐個逐個幫門徒洗佢地對臭腳﹗耶穌身體力行,成為彼此相愛既榜樣。

又或者耶穌教導門徒要憐憫,憐憫個個都成講啦,佛家又講、道家又講、學校又講、連街上面叫你捐款既人都叫我地要有憐憫之心,但耶穌「真憐憫」,睇見有幾千人無野食,得五餅二魚,卻唔係拿拿臨食番件餅,食少少都好啦,等有力先再行神蹟,卻係吩咐門徒「你們給他吃吧﹗比呢D老百姓食野先啦﹗」呢D咪叫做「真憐憫」﹗

當個個年代見到稅吏、妓女、大麻瘋、有病的、有殘疾的都雞飛狗走既時候,唯獨耶穌憐憫佢,接觸佢地、同佢地傾計、拯救佢地,呢D叫做「真憐憫」,係耶穌生命裡留下非常之多既痕跡、印記,幫助門徒去學習佢、效法佢。

學習效法

保羅說「你們該效法我、像我效法基督一樣。」縱使或許我地唔係身處係哥林多教會,縱使我地未見過耶穌、保羅、彼得、約翰,但我地總能夠找到可以效法既對象。去邊到搵好呢?我地可以睇

13:7 從前引導你們、傳 神之道給你們的人、你們要想念他們、效法他們的信心、留心看他們為人的結局

呢個既「佢地」,對每一個既信徒來講可能都唔一樣,呢度叫我地效法傳神既道既老師們既信心,而信心點樣彰顯出來,係唔係額頭鑿住個「信」字?唔係,信心彰顯係眾老師們既行動、生命裡面。起碼我地從希伯來書能夠搵到我地可以效法既對象,就係傳神之道比你地既人,我有,你地都會有。我地若想學習服事,必定離唔開效法,天父比左咁多好既榜樣我地睇,係我地生命留下咁多痕跡,

我地無藉口唔知咩叫服事。如果無人教,無一個榜樣去跟,坦白講,我根本唔知道咩叫服事,因為我地天生都係一群被人服事既人,唔識得咩叫服事人。

亦成為別人的榜樣

最後一點想同大家分享既就係當我地咁樣學習效法既時候,亦都可以成為別人的榜樣

提前 4:12 不可叫人小看你年輕.總要在言語、行為、愛心、信心、清潔上、都作信徒的榜樣

大家都會知道呢句說話係保羅講比提摩太聽,當然提摩太亦係一個效法保羅既人,保羅勸提摩太成為榜樣,「榜樣」呢個字亦都可以解作「印記」、「痕跡」的意思。正如上回我分享到歲月如梭,時光如飛而去,究竟我地生命留下D咩呢?咩都無留低?留下遺憾呀?定係你能夠係生命留下好多既痕跡,好使其他人能夠效法你?

盼望若果我地一同既效法老師們,亦一同既成為別人既榜樣,當教會咁樣一代傳一代既時候,生命就唔會白過,唔會如飛而去,
基督門徒福音會亦會薪火相傳。

2014年6月9日 星期一

生命的印記 (一)






過埋今個月,2014年將會過左一半啦,我唔知大家有咩感受,覺得「車…係咁架啦,日子係咁過架啦」,定係同樣好似我既心情咁「嘩,好恐怖呀,時間過得咁快既?」我必須要問大家一個問題,「單單係呢2014既上半年,係你既生命裡面有無留下任何既痕跡?」

當然你會同我講,「歲月既痕跡﹗有呀」例如以前我頭髮好濃密架,而家就疏落左少少;又或者以前笑起上來,塊面滑過豆腐花,完全無紋架,影相唔洗用「美肌」,而家就好似千層糕啦;又或者以前我完全無腰痛背痛呢D問題,而家成日要買定「撒隆巴斯」擺係屋企看門口,可能你會有以上隨著年齡增長而帶來身體種種既問題或者煩惱呢類型歲月既痕跡,但我要問既係「單單係2014年既上半年,你既生命深深處有無留下痕跡?」

生命既痕跡,你有留過嗎?你會唔會諗「上半年我係公司完成左一單大project,算唔算呀?」「我剛剛翻新左屋企既廚房,全部智能化,算唔算呀?」又或者「我岩岩考完DSE,算唔算係考試卷裡留下我既痕跡呀?」「um.. 好似有點兒那個。」

林前 11:1 你們該效法我、像我效法基督一樣。

保羅單單係哥林多前書呢卷書,或者係哥林多教會裡,留下很多生命既痕跡呢,而呢D既痕跡唔單止造福哥林多教會,仲要成為後輩效法既榜樣﹗

林前 11:1 你們該效法我、像我效法基督一樣。
保羅請收信人效法佢,就如同佢效法基督一樣;係希臘文既語法係用左命令式,保羅命令弟兄姊妹們要效法佢。我地唔好睇少呢一句短短既說話,只有十四個字,裡面包含非常豐富既意義。

點樣豐富法呢?保羅一方面要話比我地聽耶穌基督唔係好似我地諗得咁遙遠,咁抽象,雖然保羅唔係耶穌十二門徒之一,亦無同耶穌基督同工過,保羅話比我地聽,作為一個有血有肉既耶穌,佢係地上所做過既一切,係佢呢個同樣都係有血有肉既人可以效法,可以學習,耶穌基督對於佢來講,唔係咁遙遠,咁遙不可及既一個人物。

另外一方面,保羅係呢度無提到叫「大家效法基督,好似佢能夠效法基督一樣﹗」,保羅唔單止一次,而係兩次(林前4)。試問下我地活左咁多年,我地有無呢份勇氣去叫某某去學我地呢?可能真係無野比人學,無野值得比人效法,因為我地生命無留下任何既痕跡,讓其他人認識你,效法你,以你為榜樣。

就算今日有人幾叻都好,鑑於我地活係一個極度個人主義既裡面,為了保持個人既風格,個人既style,你最好唔好抄我,唔好學我,又或者我地作為基督徒,好可能以「謙卑」為名,就算我地生命有幾好,有幾大進步,提到「效法」?可能我地會話講呢D?唔好講呢D啦,我既生命唔好既,唔好既...」但作者的而且確記錄保羅真係叫人效法佢,我希望都能夠參詳保羅呢一句說話既意思。

2014年6月6日 星期五

沿途有祢,也有妳


video

初試啼聲,效果一流﹗
感謝天父,感謝弟兄姊妹傾力演出﹗
謝謝欣賞﹗
好戲陸續有來﹗